「聖經咁厚，點讀❓」
日日揭開，讀一讀。
......
13/11/2020（五）19:00 香港國際音樂學校301演奏廳
貝多芬250週年紀念之「貝多芬鋼琴奏鳴曲說明書」講座
老師說：「歡迎大家黎到貝多芬250週年紀念之「貝多芬鋼琴奏鳴曲說明書」講座。」
同學點頭。
老師說：「呢個講座真係有說明書送嘅，我仲喺說明書嘅封面，印咗報咗名嘅同學嘅英文名添。聽到我叫你嗰名，就出黎攞屬於你嘅說明書啦。」
老師說：「......Wai Hung。」
我走到講台前，接過說明書，書上印有「Wai Hung’s Beethoven - The Piano Sonatas - A guide to the 32 works」。
老師說：「我想今日嘅講座係資料性為輔，啟發性為主。」
鄭老師說：「在座唔識貝多芬嘅，舉手。」
沒有同學舉手。
老師說：「在座貝多芬32首奏鳴曲一首都未聽過嘅，舉手。」
沒有同學舉手。
老師說：「在座貝多芬32首奏鳴曲，是但奏到一首嘅，舉手。」
沒有同學舉手。
老師說：「我開始認識大家啦，大家原來係唔鍾意舉手。」
全場大笑。
老師說：「實科演奏，主修鋼琴嘅同學舉手。」
半場同學舉手。
老師說：「主修鋼琴嘅同學，一生人最少一定要奏到一首貝多芬鋼琴奏鳴曲先得嘅。一首都可以，知唔知點解？」
一些同學搖頭。
老師說：「因為鍾意聽貝多芬嘅，聽極同一首都唔厭；唔鍾意聽貝多芬嘅，未聽完一首就轉台。」
全場大笑。
老師說：「講下笑姐，大家屋企有冇貝多芬32首奏鳴曲嘅結集琴譜？有一本過好似字典咁厚嘅，亦有分開兩本好似教科書咁薄少少嘅。」
同學A說：「冇呀。」
老師說：「冇就快啲買番本，知唔知點解？」
同學搖頭。
老師說：「因為好奇怪，貝多芬明明死咗250年，都冇再作奏鳴曲，但係我耐唔耐去琴行，都發現套琴譜加價，所以越早買越抵。」
全場大笑。
老師說：「重點，貝多芬32首奏鳴曲，點練？」
同學搖頭。
老師說：「好，大家一齊打開說明書，攞個計數機出嚟計下，第一首，Beethoven: Sonata No.1 in F minor, Op.2, No.1，4 movements，總共有幾多個小節？」
同學B說：「152 + 61 + 73 + 196 = 482個小節。」
老師說：「耐性強嘅，一日練三個小節，咁樣161日，即係大概半年之後，就可以奏到Sonata No.1 in F minor, Op.2, No.1。」
老師說：「耐性次強嘅，一日練兩個小節，咁樣241日，即係大概大半年左右，就可以奏到Sonata No.1 in F minor, Op.2, No.1。」
老師說：「耐性唔強嘅，一日練一個小節，咁樣482日，即係大概一年多少少，就可以奏到Sonata No.1 in F minor, Op.2, No.1。」
同學B說：「嘩！」
老師說：「先唔講鋼琴技巧，再問一次，知唔知貝多芬32首奏鳴曲，點練？」
全場肅靜。
老師說：「呢位同學，你話呢？」
同學C說：「你都未講。」
老師說：「我講咗啦，嗰方法你哋個個都做得到。」
全場肅靜。
老師說：「嗰方法就係，日日番屋企，打開部琴，揭開份譜，練一個小節。」
發表新回應