本週反思#198💬

「香港那一間琴房，大割引❓」

主預備給我的那一間。

……

20/09/2021（一）19:00 柏斯琴行陳列室

主任和我試過目標的二手琴Kawaii K500之後，二手琴賣方、主任的朋友跟我說話。

朋友說：「部琴得唔得？」

我說：「好得，你唔講，我以為係新琴。」

朋友說：「係呢，我出個價點呀？」

我說：「個價好好，比新琴平咗好多。」

朋友說：「部琴呢個價好多人要。」

朋友向我展示客戶查詢紀錄。

我說：「係喎。」

朋友說：「所以我需要一個回覆限期。」

我說：「幾時？」

朋友說：「9月28號。」

朋友向我展示客戶查詢紀錄。

我說：「原來9月29號又有人想上黎睇呢隻琴。」

朋友說：「係呀。」

我說：「明白，咁我9月28號或之前覆你。」

……

21/09/2021（二）16:00 黃大仙地鐵站

另一個我說：「仲唔郁？」

我說：「郁咩？」

另一個我說：「租琴房。」

我說：「我同學負責架，咁心急做咩？」

另一個我說：「你等得，K500唔等得。」

……

21/09/2021（二）16:15 Signal

我說：「午安，想問吓租琴房嗰度點？」

同學說：「業主未覆。」

我說：「追問下業主得唔得？」

同學說：「廢事吹人啦。」

我說：「唔咪，聽日放假，我想睇。問吓姐，業主有單位想租嘅就覆，冇就唔答。」

同學說：「咁我問下先，盡快覆你。」

我說：「唔該晒。」

…..

21/09/2021（二）17:00 Signal

同學說：「聯絡人話，暫時未搵到業主出租地方俾人做琴室。」

我說：「明白。」

…..

另一個我說：「即刻搵人幫手。」

我說：「嗰琴室我同學用最多，等佢搵啦。」

另一個我說：「咁搵到先得架，大少。」

我說：「搵唔到咪繼續慢慢搵囉。」

另一個我說：「你唔想要嗰隻一手質素但係二手價嘅K500呀？」

我說：「想要，但係你點知主唔係想我哋自己搵琴房？」

另一個我說：「咁你又點知主唔係想透過其他人幫你哋搵琴房呢？」

我說：「咁又係。」

另一個我說：「你得番7日時間，你自己又要搵，又要搵人幫你搵，去啦！」

……

我說：「不如搵人幫手，好唔好？」

同學說：「好呀。」

我禱告，寫下心目中琴房的描述和預算，四出尋求協助。

……

Logic Pro X老師回覆。

老師說：「你考慮調高一下嗰預算，咁少錢好難租到呢個呎數。」

我說：「多謝建議，諗諗先。」

……

主任回覆。

主任說：「我唔識有咩人可以幫到你，不過會為呢件事祈禱。主已經安排咗一部好琴俾你，我有信心主會安排埋一間好嘅琴室俾你。」

我說：「多謝禱告。」

……

Maggie回覆。

Maggie說：「試吓問呢個主內姐妹啦，為呢件事祈禱，相信神已經預備左。」

我說：「好。」

我向主內姊妹尋求協助。

…

21/09/2021（二）18:55 Signal

姊妹傳來一張Band房截圖。

姊妹說：「我早前喺觀塘租咗嗰Band房，俾我屋企人擺嘢。」

我說：「睇嚟Band房直接用得咁？」

姊妹說：「係呀，牆身裝晒隔音棉，有枱有凳。」

我說：「嘩，正。」

姊妹說：「其實屋企人擺完嘢之後仲有位淨，我一直都想搵人分租。」

我說：「你意思係我可以同你分租呢個單位？」

姊妹說：「係呀，租金一人一半，間房基本上你哋用，我淨係擺嘢，電費你交。」

我說：「一於咁話，成交，幾時可以上去睇吓？」

姊妹說：「過兩日。到時可唔可以順手幫我攞張梳化落去樓下，我想車番屋企。」

我說：「好，冇問題。」

……

另一個我說：「嘩，聖經故仔呀？」

我說：「而家係2021年嘅香港呀！聖經故仔，番古代啦你。」

另一個我說：「唔係聖經故仔點會巧合、巧合再巧合呀？」

我說：「咩巧合、巧合再巧合呀？」

另一個我說：「第一個巧合，無啦啦有個同學衝出黎話想租琴房；第二個巧合，主任又會有嗰朋友，幫你搵定一部二手價一手質素嘅鋼琴；最後一個巧合，仲會有嗰姊妹租定嗰Band房做雜物房，等你黎同佢對半分租？」

我說：「我唔知嗰喎，我淨係信主，見步行步嘅姐。呢啲嘢，你問主啦。」

另一個我說：「你攞晒啲著數同我講唔知？」

我說：「喂！好似早幾個鐘係你叫我搵人幫手嗰喎？」

另一個我說：「我噏吓咋嘛，點知你真係跟住做，又點知你一郁，主又真係會出手幫？」

我說：「我信主，主支持我讀音樂，你唔恨得咁多啦。」

另一個我說：「你都識講啦，呢度係2021年嘅香港，你Logic Pro X老師都叫你調高一下嗰預算呀，邊有琴房可以喺你已經咁低嘅預算嗰度仲要減半再分半就租到架？」

我說：「有呀，主預備俾我嗰一間琴房囉。」